Éischt Hëllef

Hei fannt dir eng détailléiert Gebrauchsanweisung fir bei der Iwwersetzung matzemaachen. Éier dir dësen Text liest, sollt dir iech awer eng Kéier den Iwwersetzungs-HOWTO ugekuckt hunn.

Viraussetzungen

D'Iwwersetzungsaarbecht soll am beschten ënnert KDE selwer gemat ginn. De KDE-Programm fir d'Iwwersetzung ass de KBabel. Ausserdem braucht dir nach Subversion (besonnech wann dir méi Dateie wëllt iwwersetzen).

Wannt dir zum Beispill eng relativ rezent Linux-Distribution asetzt, sollten déi genannte Programmer liicht installéierbar, oder souguer schonns installéiert sinn.

Organisatioun vun der Iwwersetzung

Déi iwwersaten Dateien fënnt een um KDE-SVN-Server ënnert den zwee Verzeechnisser /trunk/l10n/lb/ an /branches/stable/l10n/lb/. De Sproochecode vu Lëtzebuergesch ass "lb".

Déi zwee Dossiere sin ennerdeelt an GUI-Iwwersetzungen (messages) an an Hëllefstext-Iwwersetzungen (docmessages). Déi original englesch Texter (templates) fënnt een an de Verzeechnisser /trunk/l10n/templates an /branches/stable/l10n/templates um SVN-Server.

D'Template-Dateie gi regelméisseg aus dem Programmquellcode generéiert, dat heescht, dass déi englesch Zeecheketten aus dem Quellcode eraus an d'Template-Dateie kopéiert ginn. D'Iwwsetzung besteet dann doranner, all déi erauskopéiert Zeecheketten (an enger neier Datei) op Lëtzebuergesch ze iwwersetzen. Déi nei Dateien op Lëtzebuergesch mussen da just nach mat engem spezielle Programm an e Binärformat iwwersat ginn, an da kënne KDE-Programmer déi Iwwersetzungen uweisen.

Déi zwee Verzeechnisser ënnert trunk/ a branches/ sinn ausserdem nach ënnerdeelt an KDE-Moduler (Programmer déi bei enger KDE-Release dobäisinn) an an extragear-Moduler (Programmer déi onofhängeg vu KDE-Releases sinn). Ausserdem wiesselen déi verschidde Moduler och nach heiansdo hir Plaz, also vun trunk op branches, an da kommen nei Dateien (templates) an d'trunk-Verzeechnis. Eng aktuell Zesummefassung vun de Plaze vun de verschiddene Moduler fannt dir ënnert Neiegkeeten. Riicht iech w.e.g. no däer Säit, wann dir nei Dateie wëllt iwwersetzen.

Da ginn et natierlech och nach fest Zäiten, zu deenen eng Iwwersetzung ofgeschloss si muss, zum Beispill virun enger neier KDE-Release. Awer och verschidden extragear-Programmer benotzen heiansdo esou fest Zäitofschnëtter, an denen déi englesch Zeecheketten sech net méi änneren, an déi dohier fir d'Iwwersetzung musse genotzt ginn. Déi entspriechend Zäiten fannt dir och ënnert Neiegkeeten.

Ariichte vum Iwwersetzen

Hei fannt dir eng Beschreiwung, wéi dir am beschten äre Computer (ënnert Linux, oder ähnlechem) ariicht fir bei der Iwwersetzung matzemaachen. Dir braucht dofir awer eng schnell Internetverbindung (anerefalls iwwersprangt w.e.g. déi komplett svn-Uweisungen an lued iech déi gewënschten Dateien ënnert WebSVN eenzel erof)

Gitt déi folgend Befeeler einfach an enger Konsol an ärem Heemverzeechnis (cd ~) an.

Maacht iech en Dossier wou dir dran iwwersetzt, zum Beispill kde-trans:

mkdir kde-trans

Leet iech dann zwee Ënnerverzeechnisser trunk/ an branches/ un:

mkdir kde-trans/trunk kde-trans/branches

Wiesselt dann an de kde-trans/trunk-Dossier:

cd kde-trans/trunk

Maacht hei en Checkout vum templates- a vum lb-Verzeechnis (daat kann e bëssen daueren):

svn co svn://anonsvn.kde.org/home/kde/trunk/l10n/templates

svn co svn://anonsvn.kde.org/home/kde/trunk/l10n/lb

An dann dat selwescht fir de branches-Dossier:

cd ../branches

svn co svn://anonsvn.kde.org/home/kde/branches/stable/l10n/templates

svn co svn://anonsvn.kde.org/home/kde/branches/stable/l10n/lb

Am nächste Schrëtt muss de KBabel agestallt ginn. Start dowéinst w.e.g. de KBabel. Nom éischte Start weist en eng Dialogbox wou Astellunge gemat musse ginn (soss ënnert Settings). Gitt do ären Numm an är E-Mail-Adress an, souwéi eis Mailinglëscht (kde-i18n-lb@kde.org) an déi richteg Zäitzon GMT+1.

Start dann de KBabel-Katalogmanager a riicht iech dann zwee Projeten an, zum Beispill kde-lb-trunk an kde-lb-branches, déi dir an deem Verzeechnis späichert, wat dir virdrun erstallt hutt (~/kde-trans). De Basisdossier vun de PO-Dateien (iwwersaten Dateien) ass dementspriechend ~/kde-trans/trunk/lb an ~/kde-trans/branches/lb. De Basisdossier vun de POT-Dateien (templates) ass ~/kde-trans/trunk/templates an ~/kde-trans/branches/templates.

Wann déi zwee Projeten ageriicht sinn, ass de KBabel souwäit configuréiert an dir kënnt mat der Iwwersetzungsaarbecht ufänken.

Iwwersetzen

Um Ufank vun enger Iwwersetzungssëtzung sollt dir är Aarbechtskopië vun de mat SVN kontrolléierte Verzeechnisser op de leschte Stand bréngen. Dësst mat dir mam SVN-Kommando svn up. Fir elo all är Dossieren z'aktualiséieren kënnt dir de folgende Befeel am kde-trans Dossier aginn:

svn up trunk/lb trunk/templates branches/lb branches/templates

Dono kënnt dir de KBabel-Katalogmanager opmaachen an de kde-lb-trunk- oder kde-lb-branches-Projet lueden. Dir gesitt dann eng Lëscht vun all den Dateien an hieren Iwwersetzungszoustänn. Wann dir mat der rietser Maustast op eng Datei klickt, kënnt dir se mam Kontextmenü am KBabel selwer opmaachen.

Wann dir nach aner Froen hutt, kënnt dir se gäeren op der Mailinglëscht stellen.